Matagumpay na isinagawa ng City Government of Isabela, sa pamamagitan ng Gender and Development (GAD) Unit, katuwang ang EarthSoul Agri-Techno Farm Institute, Inc. na pinamumunuan ni G. Ibno D. Turabin, ang Graduation Ceremony ng mga trainees ng Training on Coconut-Based Integrated Organic Agriculture Production noong Enero 29, 2026 sa Kabbun Pandoga Farm Resort, Lukbuton, Isabela City, Basilan.
Ang seremonyang ito ay nagsilbing pagtatapos ng 10-araw na masinsinang pagsasanay na isinagawa mula Enero 19 hanggang Enero 29, 2026, kung saan ang mga kalahok ay hinasa sa kaalaman at kasanayan sa organikong pagsasaka na nakabatay sa niyog bilang isang napapanatiling kabuhayan.
Sa kanyang mensahe ng suporta, binigyang-diin ni City Mayor Sitti Djalia A. Turabin-Hataman ang kahalagahan ng organikong agrikultura sa pagpapalakas ng kabuhayan ng mga Isabeleños. Ayon sa alkalde, nawa’y maging kapaki-pakinabang ang mga kaalamang natutunan ng mga trainees at magsilbing tulay ito sa mas matatag na hanapbuhay, gayundin ang pag-oorganisa ng isang kooperatiba sa larangan ng organikong pagsasaka sa hinaharap.
Bilang patunay ng kanilang pagsisikap at dedikasyon, ginawaran ng mga sertipiko ang mga trainees na matagumpay na nakatapos ng pagsasanay. Sa kanilang pagbabahagi, ipinahayag ng mga kalahok ang kanilang taos-pusong pasasalamat sa oportunidad at nangakong ipagpapatuloy at isasabuhay ang mga kaalamang kanilang natutunan upang mapanatili ang makakalikasang pamamaraan ng pagsasaka.
Sa kanyang pangwakas na pananalita, ibinahagi ni City Information Officer at GAD Focal Person, Bb. Mendry-Ann A. Lim na layunin ng programang ito ang paggamit at pagpapayaman ng lokal na organikong agrikultura, upang sa hinaharap ay hindi na kinakailangang umangkat o bumili pa ng mga produktong agrikultural mula sa ibang lugar, kundi magkaroon ng sariling sapat at sustenableng produksyon ang lungsod.
Ang aktibidad na ito ay patunay ng patuloy na pagsusumikap ng City Government of Isabela at ng mga katuwang nitong institusyon na isulong ang sustainable agriculture, seguridad sa pagkain, at pangmatagalang kaunlaran ng komunidad.
